کورتەی لوتکەی عێراق بەبێ بابەتی دەنگی و ڕەنگی هاککراو ٢٠٢٥: پابەندبوونی سەرتاسەری لە دژی بابەتی دەنگی و ڕەنگی هاککراو

‌

بەغداد، عیراق- ١٦ ی شوباتی ٢٠٢٥. لوتکەی عیراق بەبێ بابەتی دەنگی و ڕەنگی هاککراو ٢٠٢٥ (IWIPS – The International Workshop on Internationalization of Products and Systems: وۆرکشۆپی نێودەوڵەتی بۆ بە نێودەوڵەتیکردنی بەرهەم و سیستەمەکان) کە لە ١٦ ی شوباتدا لە شانۆی مەنسور لە بەغداد بەسترابوو ساتێکی مێژوویی و هەنگاوێکی گەورە بوو لە جەنگی عیراق دژی بابەتی دەنگی و ڕەنگی هاککراودا . لە لوتکەکەدا بەرپرسانی حکومی لە ئاستی باڵا و بەڕێوەبەرانی جێبەجێکاری ڕاگەیاندنی جیهانی و کۆمپانیا پێشەنگەکانی تەکنۆلۆژیا و بابەتسازانی تۆڕی کۆمەڵایەتی کۆبونەوە و چەندان ئاستەنگی جۆراوجۆریان شەنوکەو کرد کە بەهۆی بڵاوکردنەوەی بابەتی نایاساییەوە هاتونەتە کایەوە. گفتوگۆکان جۆراوجۆر بوون لەسەر ڕۆڵی دەستەکانی ڕێکخستن لە جێبەجێکردنی یاساکانی موڵكی هزری و لێکەوتە ئابوری و کەلتوریەکانی بابەتی دەنگی و ڕەنگی هاککراو و پیشەسازیە داهێنەرەکان لە عیراقدا. 

دانیشتنە سەرەکیەکان ستراتیژیەتی جۆراوجۆریان داڕشت بۆ پاراستنی بابەتە دەنگ و ڕەنگیەکان و کاریگەری بابەتی دەنگی و ڕەنگی هاککراو لەسەر پەخشتی وەرزشی و کاریگەری دابینکارانی خزمەتگوزاری ئینتەرنێت لەسەر داڕشتنی ژینگەیەکی دیجیتاڵیی پارێزراو و دەستپێشخەری بەهێزیان پێشنیار کرد بۆ پشتیوانیکردن لە دابەشکردن و بڵاوکردنەوەی یاسایی بابەتی دەنگی و ڕەنگی. هەروەها تیشك کرایە سەر هەوڵی بەردەوامی عیراق بۆ یەکخستنی لەگەڵ ئابوری ڕاگەیاندنی جیهانی لە ڕێی وەبەرهێنان لە بەرهەمە ناوخۆییەکان و چاکسازیەکانی یاسادانان و هاوبەشێتی نێوان کەرتی گشتی و تایبەت کە ئامانجیان پشتیوانیکردنە لە ژینگەیەکی دیجیتاڵیی گەشاوە و هاوتا لەگەڵ یاسادا. 

بە سەرپەرشتی خاتوو دکتۆر هەیام ئەلیاسری، وەزیری پەیوەندیەکان، لوتکەکە چەندان وتار و گفتوگۆ و دانیشتنی کارلێکاوی تێدابوو کە هەموویان لە سەنگەری دژی بابەتی دەنگی و ڕەنگی هاککراودا بوون. 

خاتوو دکتۆر هەیام ئەلیاسری لە وتەی دەستپێکیدا وتی:

"پاراستنی مافی هزری بابەتێکە چەندان لایەنی ئاکاری و یاسایی و ئاینی و نیشتیمانی لەخۆ دەگرێت، عیراقی ئەمڕۆ هەوڵی چڕ دەدات لەپێناوی داڕشتن و دانانی ڕێکاریی بۆ پاراستنی موڵكی هزری و جەنگان لە دژی بابەتی دەنگی و ڕەنگی هاککراو".

خاتوو هەیام دڵنیاییدا لەوەی وەزارەتەکەی سیاسەتی گشتی دادەڕێژێت بۆ کەرتی پەیوەندی و کار دەکات لەسەر باشترکردنی ژینگەی موڵكی هزری لەڕێی بڕیاردانی پێویست بۆ دابینکردنی پاراستن. 

هەروەها خاتوو هەیام تیشکی کردە سەر ئەوەی کە چەندان بابەتسازانی دەنگی و ڕەنگی هەن کە هەوڵی زۆریان داوە و داهێنانیان کردووە و بیرۆکەیان داڕشتووە، کەچی لەولاوە کەسێك دێت ئەم هەموو هەوڵ و تێکۆشانە دەدزێت و بڵاوی دەکاتەوە بەبێ ڕێپێدان، خاتوو هەیام جەختی کردەوە سەر بەرەنگاربوونەوەی ئەم کارەساتە و وتی:

"زۆر گرنگە ئەم ئاڵنگاریە بگرینە ئەستۆ و هەوڵی دانانی ڕێکاری توند بدەین بۆ بەرەنگاربوونەوەی بابەتی دەنگی و ڕەنگی هاککراو و هاندەر بین بۆ دەستخستنی بابەتی دەنگ و ڕەنگی یاسایی."

هەروەها پێشەنگانی سەرەکی پیشەسازی، وەک بەڕێز خافێر تیپاس، سەرۆکی دەستەی خولی ئیسپانی بۆ تۆپی پێ (La Liga) و بەڕێز سەباح ئەلکەبیسی، سەرۆکی جێبەجێکاری کۆمپانیای سوپەر سێڵ Supercell جەختیان کردەوە سەر ڕۆڵی یەکلاکارەوەی ڕێکار و چوارچێوە یاساییەکان و هاریکاری پیشەسازی و هوشیاری گشتی لە بەرەنگاربوونەوە و ڕاگرتنی بابەتی دەنگی و ڕەنگی هاککراودا. 

بەدڕێژایی ماوەی لوتکەکە، ئامادەبووان ڕوانیانە ئەوەی چۆن بابەتی دەنگی و ڕەنگی هاککراو کاریگەری نەرێنی دەکاتە سەر هونەرمەندان، لێدوان درا لەسەر ئەوەی عیراق بە شێوەیەکی کاریگەر بۆتە مۆڵگەی ماڵپەڕە نایاساییەکان کە بابەتی دەنگی و ڕەنگی و دیجیتاڵی بەبێ ڕێپێدان بڵاو دەکەنەوە. ئەم ڕاستیە بۆتە هۆی ساردکردنەوەی وەبەرهێنەر و کۆمپانیاکانی ڕاگەیاندنی بیانی تا پاڵپشتی هونەرمەندان و بابەتسازانی ناوخۆیی عیراق بکەن. بەشداربووان هاودەنگ بوون لەسەر ئەوەی ڕاگرتن و داخستنی ئەم ماڵپەڕ نایاساییانە و بەتاوانکردنی بابەتی دەنگی و ڕەنگی هاککراو دوو هەنگاوی پێویستن بۆ پاراستنی داهێنانی کەلتوری وهونەری. گفتوگۆی تایبەت کرا لەلایەن کۆمپانیاکانی خۆرهەڵاتی ناوەڕاست و باکوری ئەفریقا لەلایەن دوو بەڕێوەبەرە جێبەجێکارەکەیMBC  و کۆمەڵەی بی ئینی ڕاگەیاندن  TOD  و ناگرا کودێلسکی  NAGRA Kudelski Group لەسەر بابەتی دەنگی و ڕەنگی هاککراو و چۆنیەتنی چارەسەرکردنی ئاڵنگاریە بەردەوامەکانی دابەشکردنی بابەتی دەنگی و ڕەنگی ڕێپێنەدراو. 

لە درێژەی لێدوانەکەیدا بەڕێز سەباح ئەلکەبیسی، سەرۆکی جێبەجێکاری کۆمپانیای سوپەر سێڵ وتی:

"توانیومانە وەبەرهێنەرانی بیانی بهێنینە بەغداد بۆ بینی بەغداد و ئەو گەشەپێدانەی لەسەر ئاستی وڵاتەکە بەدەستی هێناوە، ئەمە شتێکی دڵخۆشکارە بۆ ئێمە بە تایبەتی پاش ئەوەی جۆش و خواستی ئەوانمان بینی و چۆن بە شێوەیەکی ئەرێنی کارلێکیان کردووە لەسەر بینینی ئەم کەرتە و خێرایی گەشەکردنەکەی لە عیراقدا."

هەروەها دڵنیایدایەوە سەر ئەوەی کە چۆن سوپەر سێڵ بە درێژایی سێ ساڵ هاریکاری حکومەتی عیراق و لایەنە پەیوەندیدارەکان و کەرتی تایبەتی کردووە بۆ بەرەنگاربوونەوەی بابەتی دەنگی و ڕەنگی هاککراو و لە هەمان کاتدا سەرقاڵی ڕاکێشانی سەرنجی کۆمپانیا جیهانیەکان بووین بۆ بابەتی دەنگ و ڕەنگی پارێزراو و ئێمەش وا بەری ڕەنجی ئەو چەند ساڵە دەبینین. 

هەروەها لەم بۆنەیەدا تیشك کرایە سەر پابەندبوونی عیراق بە پشتیوانیکردنی سیستەمی ڕاگەیاندنی بەهێزەوە لەڕێی دەستپێشخەری وەکو سندوقی فلیمی عێراقی کە دکتۆر عارف ئەلسەعدی پێشنیاری کردووە کە ڕاوێژکاری سەرۆک وەزیرانە بۆ کاروباری ڕۆشنبیری. ئەم هەوڵانە ئامانجی فراوانی عیراق پشتڕاست دەکەنەوە بۆ یەکبوون لەگەڵ ئابوری ڕاگەیاندنی جیهانی و پشتیوانیکردنی کەرتە داهێنەرەکانی وڵاتەکە. 

لە لێدوانێکی تردا، بەڕێز ئەحمەد ئەلشەقرا، بەڕێوەبەری سەکۆی ١٠٠١ بۆ بابەتی دیجیتاڵی، هەڵوێستی عیراقی پشتڕاست کردەوە لە ڕێگرتن لە بابەتی دەنگی و ڕەنگی هاککراو، وتی: 

"ئێمە جەختمان کردۆتەوە سەر گفتوگۆکردن لەسەر لێکەوتەکانی بابەتی دەنگی و ڕەنگی هاککراوی کۆمپانیاکان لەسەر کەرتە داهێنەر و هونەریە عیراقیەکاندا، لەگەڵ جەختکردنەوە سەر ڕاگرتنی ماڵپەڕ و خزمەتگوزاریەکان کە بابەتە دەنگی و ڕەنگیەکان هاك دەکەن (ساختە دەکەن) و بەشێوەی نایاسایی بەردەستیان دەکەن، هەروەها ڕاگرتنی ئەو سەکۆیانەی کاریان لەگەڵ دەکەن بۆ بڵاوکردنەوەی بابەتی دەنگی و ڕەنگی هاککراو."

دڵنیاییدا لەسەر ئەوەی ئەم جەختە گشتگیرە بۆ بابەتی دەنگی و ڕەنگی عیراقی و عەرەبی و بگرە جیهانیش، ئەحمەد تیشکیشی خستە سەر ئەوەی عیراق بەهۆی ئەو هەلومەرجەی پیایدا تێپەڕێوە لە پێشوودا و وەکو دەرەنجامی ناسەقامگیری بارودۆخی عیراق بۆ ماوەیەکی زۆر، عیراقیان کردۆتە مۆڵگەی سەکۆکانی هاککردن، ئەمەش زیانی گەورە لە داهێنەران و هونەرمەندان دەدات، هەروەها زیان دەدات لە پیشەسازی بابەتسازی و پیشەسازی کاتبەسەربردن لە عیراقدا. 

عیراق بەردەوامە لە هەوڵەکانی بۆ پاراستی موڵكی هزری، لوتکەی عیراق بەبێ بابەتی دەنگی و ڕەنگی هاککراو ٢٠٢٥ هەنگاوێکی گرنگە بۆ داڕشتنی پیشەسازی ڕاگەیاندنی بەردەوام و پارێزراو بە یاسا، تا ببێتە پیشەسازیەک کە تیایدا دەربڕینی هونەری بگەشێتەوە و وەبەرهێنەرە بیانیەکان متمانەیان بۆ بگەڕێتەوە بۆ پشتیوانی کردن لە لایەنە کەلتوری و هونەریەکان لە عیراقدا.