راگەیێندراوی کۆتایی لووتکەی بەغدا

‌

جاڕ میدیا، به‌غدا

لووتکەی بەغدا بۆ هاوکاری و هاوبەشی کە ئەمڕۆ شەممە 28ـی ئابی 2021 بە بەشداریی سەرۆک، وەزیرانی دەرەوە و نوێنەری نۆ وڵاتی ناوچەکە و دراوسێی عێراق بەڕێوەچوو، جەختیان لە پاڵپشتیی عێراق کردەوە، ئاماژەیشیان بەوە کرد، بەبێ سەقامگیریی عێراق، ناوچەکە سەقامگیر نابێت.

 

بەپێی راگەیێندراوی کۆتایی لووتکەکە، وڵاتانی بەشدار، "پاڵپشتیی خۆیان بۆ وەستان لەگەڵ گەل و حکومەتی عێراق دووپاتکردەوە و جەختیان لەسەر یەکخستنی هەوڵەکان بۆ یەکخستنی هەوڵە هەرێمی و نێودەوڵەتییەکان کردەوە بەشێوەیەک کە بەباشی لەسەر سەقامگیریی و ئاسایشی ناوچەکە دەشکێتەوە."

 

عێراق رۆڵی کۆماری فەرەنسا لە رێکخستن و ئامادەبوونی لە لووتکەکە و "بەشداریی کارای بەرز دەنرخێنێت."

 

راگەیێندراوەکە دەڵێت، "بەشداربووانی کۆنگرەکە پێشوازییان لە هەوڵە بەردەوامەکانی حکومەتی عێراق بۆ گەیشتن بە زەمینەیەکی لەباری هاوبەشییەکانی لەسەر ئاستی هەرێمی و نێودەوڵەتی کرد ئەوەش لەپێناو تۆکمەکردنی هاوبەشییە سیاسی،  ئابووری و ئەمنییەکان و پشتبەستن بە دیالۆگی بونیادنەرانە و جەختکردنەوە لە لێکتێگەیشتنەکان لەسەر بنچینەی بەرژەوەندییە هاوبەشەکان، هاوکات لەخۆگرتنی بەغدا بۆ ئەم کۆنگرەیە بەڵگەیەکی روونە لەسەر پشتبەستنی عێراق بە سیاسەتی هاوسەنگی و هاریکاریی پۆزەتیڤانەی لە پەیوەندییەکانی دەرەوەیدا."

 

لەبارەی هەڵبژاردنی پێشوەختەش کە بڕیارە لە 10ـی ئۆکتۆبەر بەڕێوەبچێت، راگەیێندراوەکە دەڵێت، وڵاتانی بەشدار "پشتیوانیی هەوڵەکانی عێراق دەکەن لە داوای چاودێریی نێودەوڵەتی بۆ گەرەنتیکردنی بێگەردی و شەفافیەتی هەڵبژاردنی پێشوەختە."

 

بەشداربووان بەپێی راگەیێندراوەکە ستایشی عێراقیان کردووە لەپای هەوڵ و قوربانییە گەورەکانی لە شەڕی دژی تیرۆردا. هاوکات "پێشوازیان کرد لە گەشەکردنی توانا سەربازیی و ئەمنییەکانی عێراق لەناوچەکە و هەموو جۆرە شێوازێکی تیرۆر و بیری تووندڕەویشیان رەتکردەوە."

 

لەبارەی ئابووریشەوە، لووتکەکە داوای لە عێراق کردووە کە بەردەوام بێت لە هەوڵەکانی بۆ رەخساندنی ژینگەیەکی گونجاوی ئابووری و بەردەوام بێت لە دۆزینەوەی هەلی کار و بەرەوپێشبردنی. 

 

گۆڕانی کەشوهەوا و بواری تەندروستی دوو تەوەری دیکەی گفتوگۆکان بوون. لە راگەیێندراوەکەدا هاتووە، بەشداربووان رێککەوتن "لەسەر پێویستیی تۆکمەکردنی هەوڵەکان لەگەڵ عێراق بۆ مامەڵەکردن لەگەڵ رکابەرایەتییەکانی لێککەوتەی گۆڕانکاریی کەشوهەوا و قەتیسبوونی گەرما بەپێی رێککەوتننامە نێودەوڵەتییە پەیوەندیدارەکان." 

 

ئەو وڵاتانەی بەشداری لووتکەکە بوون بریتی بوون لە: سعودیە، ئیمارات، میسر، قەتەر، فەرەنسا، تورکیا، ئوردن، ئێران و کوێت. ئاستی نوێنەرایەتیکردنی ئەو نۆ وڵاتەی بەشدار بوون جیاوازە و بەمشێوەیەیە:

 

- ئیمانوێل ماکرۆن، سەرۆکی فەرەنسا

 

- ئەحمەد ئەبو غێت، ئەمینداری گشتیی کۆمکاری عەرەبی 

 

- تەمیم حەمەد ئال پانی، میری قەتەر

 

- عەبدولفەتاح سیسی، سەرۆکی میسر

 

- شا عەبدوڵڵای کوڕی شا حوسێن، شای ئوردن

 

- سوباح خالید ئەلسوباح، سەرۆکوەزیرانی کوێت

 

- محەممەد بن راشد ئال مەکتووم، سەرۆکوەزیرانی ئیمارات 

 

- مەولوود چاوشئۆغڵو، وەزیری دەرەوەی تورکیا

 

- حوسێن ئەمیر عەبدوڵڵاهیان، وەزیری دەرەوەی ئێران

 

- فەیسەڵ بن فەرحان ئالسعود، وەزیری دەرەوەی سعودیە